É NECESARIO UN COMPROMISO SOLIDARIO MUNDIAL PARA QUE TODOS SE
POIDAN BENEFICIAR DOS FROITOS DA TERRA
No ano 2000 todos os países acordaron traballar xuntos para acabar coa fame
antes de 2015. A menos dun ano para que acabe o prazo, comprobamos que estamos moi
lonxe de poder conseguir este obxectivo.
Hoxe, 842 millóns de persoas pasan fame. É un escándalo que non
podemos consentir. Está nas nosas mans ofrecer solucións para que se cumpra este dereito fundamental para
todos.
Para acabar con esta traxedia é urxente xerar unha nova orde de
relacións entre persoas, asociacións, empresas, organismos públicos e entre
países, que reflicta a fraternidade que nos une a todos. Porque o
desenvolvemento dos pobos depende, sobre todo, de que aprendamos a vivir como
membros da mesma familia. É necesario un compromiso solidario mundial para que
todos nos poidamos beneficiar dos froitos da Terra.
Por iso, desde Mans Unidas,
asociación da Igrexa católica para a axuda, promoción e desenvolvemento dos
países do Sur, na campaña que agora iniciamos, convocamos a todos a traballar
fraternalmente por “Un mundo novo, proxecto común”, porque acabar coa fame é
responsabilidade de todos, e só será posible se todos traballamos como
auténticos irmáns.
Por estas razóns demandamos:
1. A todas as institucións políticas, culturais e
relixiosas que busquen un diálogo fecundo, capaz de analizar a fondo as causas
das inxustizas, e propoñer as medidas necesarias para defender eficazmente o
ben común.
2. Ás empresas e entidades financeiras que
desterren as relacións baseadas no logro de máximo beneficio e poñan no centro
dos seus intereses o ben da persoa.
3. Á comunidade internacional que mellore a
cooperación e favoreza unha política comercial coherente coa defensa dos
dereitos humanos.
4. Aos países desenvolvidos que se comprometan a
aumentar a Axuda Oficial ao Desenvolvemento, aliviando a débeda externa e
compartindo cos países do Sur o acceso aos mercados, e aqueles medios que
garantan a defensa efectiva dos seus dereitos fundamentais.
5. Aos países en desenvolvemento que melloren a
súa gobernabilidade, a transparencia na xestión dos seus recursos e o compromiso
serio na defensa dos dereitos fundamentais.
6. A todos os gobernos e institucións internacionais
que establezan regras xustas para que os
países poidan establecer relacións mercantís seguras e non
discriminatorias.
7. A todas as persoas e institucións que promovan
un modelo de desenvolvemento sostible, que salvagarde os recursos naturais,
utilizándoos responsablemente e poñéndoos a disposición, especialmente, dos maís
necesitaddos; un desenvolvemento que fomente a austeridade no consumo e deteña
o consumismo compulsivo e irresponsable.
8. En definitiva, demandamos a defensa dun modelo
de desenvolvemento que poña as persoas no centro, a súa inviolable dignidade, e
os dereitos fundamentais que lles pertencen; e que atenda aos pobres
especialmente.
Co papa Francisco, convidamos a todos “a dedicar un lugar especial, nos
nosos corazóns, para esta emerxencia, que é respectar o dereito outorgado por
Deus a todos de ter acceso a alimentos axeitados, a compartir o que temos, en
caridade cristiá, con aqueles que teñen que enfrontarse a moitos obstáculos,
para satisfacer esa necesidade básica”.
Ao comezar esta nova campaña, pedímoslle a Deus que nos conceda a graza
de ver un mundo no que que ningúen deba morrer de fame.
Un mundo novo, proxecto común.
PRESENTACIÓN PPT MANOS UNIDAS
